Flytta frå opphavleg plass
Bautasteinen på Nybø står vel 100 m vest for bygningane i Fylkesmannsgarden, snaue 10 meter frå stranda. Han er 5 m høg, 0,65 m brei og 0,25 m tjukk. Det er spor etter avslag somme stader på sidene, men det er ikkje funne spor av innskrift av noko slag. På 1900-talet vart steinen flytta to gonger i samband med utviding av vegen. Fyrst vart han flytta ovanom vegen frå den opphavlege plassen nokre meter lenger nede i den nye vegtraseen, men seinare ved ny vegutviding nedover att, til flata ved sjøen der han står no.
Fornfunn og utgraving
Etter at det ved vegarbeid i 1941 kom for dagen ei ravperle i nedrausa jord, føretok arkeolog Per Fett utgravingar ved steinen. Han fann fleire graver. Omlag 5-6 meter ovanfor steinen vart funne ei 0,5 m lang hellekiste, truleg ei barnegrav frå eldre jernalder. Tett attmed vart funne ei 1,5 m lang mannsgrav frå same perioden. Eit stykke nedanfor, i nedre del av vegfundamentet, vart det funne eit beisel frå yngre jernalder.
