Indreværvågen i 30-åra, med f.v. Andersnaustet,  Nilsskjåen og Gullakskjåen. Her på den vesle øya kjende David Olai Lund som barn at han fekk misjonskall, og her la han første grunnlaget til førebuinga av sitt store livsverk som misjonær. 

Filippiner-Lund vidkjend og avhalden misjonær

David Olai Lund, betre kjend som Filippiner-Lund, vert rekna blant våre største misjonærar. Han såg tidleg vegen han måtte gå og førebudde seg særs grundig til gjerninga. Saman med kona la han ned alle sine krefter i misjonsarbeidet på Filippinane.

Fattig stove, gåverikt barn

I ei lita røykstove, med ljore og grue, heilt i strandkanten på nakne, vêrharde Indrevær kom David Olai Rasmussen Indrevær til verda i 22. desember 1863. Foreldra var fattige, arbeidssame husmannsfolk som livnærte seg av sjøen. Vesle David Olai var heimedøypt av skulemeister Torkjel Jensen, og ein av fadrane, som budde like ved, fekk mykje å seie for barnet si åndelege utvikling. David Olai hadde særleg arva faren sine gode evner. Mora var kjend for å ha ei vakker songrøyst. God songstemme fekk også David i voggegåve, og han var i tillegg utifrå musikalsk. Som ungdom og vaksen var han god både på gitar, orgel og piano.

David Olai Rasmussen Indrevær vart kalla Filippiner-Lund. Her staseleg oppdressa for fotografen.   

David Olai Rasmussen Indrevær was called Filippiner-Lund. Here he is dressed up in his Sunday best for the photographer. 

Datering
Ca. 1950.
Fotograf
Ukjend.
Eigar
Hans H. Steinsund.

Måtte vegen om fiskebåten

I eitt av nabohusa budde ein jamgammal gut. Dei to var særs gode vener og reiste seinare til Nordland på fiske, og delte fortenesta likt.

Forkynnar og songar

Eitt år rodde David Olai torskefiske frå Ålesund. Ein sommar på sildefiske slo bra til. Alt kom vel med for han måtte skaffe seg ei utdanning slik at han kunne realisere misjonskallet. Heime var inga råd med økonomisk hjelp.

Ferda gjekk til Bodø der han tok middelskuleeksamen med beste karakterar, visstnok i 1886. Eitt år seinare går han om Lærdal over fjellet til Valdres og vidare til Oslo. Med gitaren over ryggen tek han vegen langt ut på bygdene, stundom som forkynnar, stundom som songar. I denne perioden er han på predikantskule i Ørebro og på medisinsk kurs hos dr. Finne i Oslo.

Nytt etternamn

David Olai trefte fleire gonger på menneske som hjelpte han økonomisk for ei tid, og slik var det vel han kom seg over til Amerika kring 1890. I fleire år vart det farm- og fabrikkarbeid om sommaren og studiar om vinteren. Ei tid arbeidde han hos ein velståande svenskfødd farmar som heitte Lund og var einsleg. Han vart så imponert av David sin kristne vandel, og så takksam for si eiga frelse, at han tilbaud David å arve han dersom han tok etternamnet Lund. David Olai tok imot. David Lund vart dessutan eit lettare namn å reise rundt i verda med.

 

 

Til sørlege Filippinane

I Amerika studerte David på Augsburg Seminar i Minneapolis der han vart høgt verdsett for sine gode evner og kunnskapar. Siste året han var i Amerika, reiste han rundt og forkynte. Han var òg på Dei vestindiske øyane og i Japan, der han dreiv medisinske studiar. Heimkommen derfrå, gifte han seg i 1897 med svenskfødde Hulda Frikmann som var lærarinne i USA.

Det vart Filippinane, særleg øya Mindanao, som vart misjonsfeltet for dei to. Øyane måtte Spania overlate til USA i 1898. Etter at spanjolane hadde omvendt folket, dels med militær makt, var ein stor del av folket eit slags katolikkar då Lund kom hit i 1901.

David Olai Lund var misjonær på Mindanao, den sørligaste hovudøya på Filippinane. Han var også ei tid på Suluøyane, som er arkipelet til venstre for Mindanao. 

David Olai Lund was a missionary on Mindanao in the Philippines. He was also for a time on the Sulu islands.

Sjølvoppofring til siste slutt

Både Lund og kona kunne spansk då dei kom til Filippinane og starta straks misjonsarbeidet. I førstninga forkynte dei i gater og butikkar. Seinare fekk dei opp enkle kyrkjer. Amerikanarane begynte å byggje vegar, og det vart lettare å nå innover på øya. Lund arbeidde ei tid på Suluøyane, der utfordringane med natur og folk vart endå større. Misjonsvener heime i Noreg og i andre land støtta opp økonomisk. Kona dreiv også søndagsskule, og på uforståeleg vis greidde ho å starte og drive ein jenteheim for foreldrelause.

Lund gjorde tre reiser over Amerika til heimlandet. På alle dei tre reisene heim til Noreg var han innom Indrevær og såg til foreldra sine. På ei av ferdene, i 1913, laga bygdefolket stor avskilsfest for han i Straumskyrkja, der Bernt Kverhellen hadde dikta ein vakker hyllingssong til han.

Han og kona arbeidde utrøtteleg på misjonsmarka til dei døydde, han i 1925, ho truleg kring 1940.

Bedehus til minne om David Lund

I 1961 sette bygdefolket i vestre Solund opp eit bedehus på Indrevær til minne om den store misjonæren frå øya. Huset, som er det einaste bedehuset i Solund, ber namnet David Lunds Minne. Delar av huset har vore eit stovehus.

Bedehus på Indrevær til minne om David Lund. Biletet er frå innviingsdagen i 1961. 

Chapel at Indrevær in memory of David Lund. The picture is from the consecration im 1961.

Datering
1961.
Fotograf
Aud Bjørknes.
Eigar
Aud Bjørknes.