Vikøy er nemnd som prestegard på 1300-talet, men både som kyrkjestad og prestegard er Vikøy eldre enn dette. Vikøy er ein av dei få embetsgardane som framleis har sitt gamle tun, bygd som ein av gardane i Kvam, utan noko dominerande hovudhus av «embetsmannstype», slik dei var vanlege på 1700-talet. Stovehuset er eigentleg tre hus bygde saman, opphavleg med ei røykstove frå 1612 midt i anlegget. I tunet ligg også eit stabbur frå slutten av 1700-talet; det såkalla Selmerhuset – ei eldre røykstove innreidd som eldhus og ombygd kring 1870 – og Borgstova; ei røykstove frå 1815. Det er ei slik stove Tidemand brukte som modell i Haugianerne.
Tidemand var på friarferd til søster åt soknepresten, Claudia Jæger, i 1843. Etter at dei var gifte, var han årviss i Vikøy om sommaren i mange år. Tunet er i dag freda.
